|
Tres sunt montes in quos ascendit Dominus. In primo transfiguratus est,
et videtur gloria ejus. In secundum ascendit docere. In tertium ascendit
solus orare. Ascendamus ergo in primum ad eum, formantes in cordibus
nostris patriarcharum, prophetarum, apostolorum, martyrum, confessorum
et virginum multiplices mansiones, ut cognita dulcedine domus Dei et
gloria ejus dicamus: Bonum est nos hic esse (Matth. XVII). Eligentes
autem illic esse ut viam discamus, ascendamus alium montem in quo docet
et scalam erigit octo distinctam interscalaribus, cujus summitas coelos
tangit. Beati qui persecutionem patiuntur propter justitiam (Matth. V).
In hunc montem ubi dicere poteris Domino Jesu: Verba vitae aeternae
habes (Joan. VI), non gravabimur ascendere si primum montem gloriae ejus
jugi meditatione ascendimus. Sic enim audies. Et quo eam scitis, propter
ascensionem primam et viam scitis (Joan. XIV), propter secundam. In
primo itaque transfiguratus est ut scires quo tenderes, id est gloriam
ejus quam tibi promittit. In secundo verba vitae locutus est, ut scires
qua pervenires. Oravit in tertio, ut eundi et perveniendi bonam obtineas
voluntatem, et studium adhibeas diligens.
|
|
