TIT. LXXXV. De triplicis regni aquisitione.

Primum quaerite regnum Dei et justitiam ejus (Matth. VI). Triplex est regnum, potentiae, gratiae, gloriae. De primo dicitur: Regnum tuum regnum omnium saeculorum (Psal. CXLIV). De secundo: Regnum Dei intra vos est (Luc. XVII). De tertio: Regnum meum non est de hoc mundo (Joan. XVIII). Regnum potentiae est in omni creatura, regnum gratiae in praesenti Ecclesia, regnum gloriae in vita aeterna. Regnum potentiae tripliciter quaeritur: Per superbiam, per fraudem, et per hypocrisim. Per superbiam, ut ipse qui est rex inter omnes filios superbiae: Sedebo, inquit, ad aquilonem, et ero similis Altissimo (Isa. XIV). Imitantur autem illum qui sunt ex parte ejus; per fraudem, ut Herodes; per hypocrisim, ut Antichristus, et omnes hypocritae cum illo. Regnum autem gratiae et gloriae quaeritur per poenitentiam et confessionem, ut latroni in cruce qui per violentiam illud rapuit. Sunt qui hoc duplex regnum Dei nequaquam quaerunt, sed lucrum saeculi. Alii non primo regnum Dei quaerunt, sed rerum lucrum et usum. Alii utrumque quaerunt, sed primo lucrum saeculi. Alii primo regnum Dei. Primi sunt carnales, secundi sunt singulares, tertii sunt animales, quarti spirituales. Propter primos qui nunquam regnum Dei quaerunt dicitur, quaerite. Propter eos qui primo aliud quaerunt, subdit, primum regnum. Propter eos qui regnum saeculi quaerunt, adjungit, Dei. Propter eos qui non Dei, sed saeculi vel suam justitiam quaerunt, addit, et justitiam ejus. Est enim justitia ad saeculum, est ad seipsum, est ad Deum. Justitiam ad saeculum quaerit qui humano vult justificari judicio, et terrenis anteponit coelestia, ita ut illa sumat ad usum necessitatis, non ad fructum utilitatis. Hic dum unicuique reddit quod suum est, necessitati temporalia, utilitati aeterna, per iter justitiae festinat ad regnum gloriae; et ut quaedam summa comprehendatur; alii neque regnum quaerunt Dei, neque justitiam ejus, ut carnales; alii regnum Dei quaerunt, sed non ejus justitiam, ut singulares; alii regnum Dei et justitiam ejus quaerunt, sed non primum, ut animales; alii primum, et regnum Dei, et ejus justitiam quaerunt, ut spirituales.