|
Dominus noster habet proprias sagittas quibus hostes suos vulnerat, et
in brachio virtutis impugnat. Sunt autem tres sagittae quibus hostes
sauciantur. Stimulus amissae pecuniae, quia valde tristatur dum
instrumenta vivendi, et satellites voluptatum et divitias amisisse
reminiscitur. Sequitur pestis corporalis molestiae, quae ut ejus vias ex
animi potestate sopiat, eum quem ad peccatum festinare considerat, per
corporis contritionem flagellat. Sequitur malleus infernalis memoriae,
quia cum se homo, undique circumseptum pondere poenarum corporalium
pensat, etiam ad illam quae fine caret angustiam oculos convertens,
horribilem gehennae fornacem timida secum consideratione pertractat.
|
|
