|
Data est mihi omnis potestas, etc. (Matth. XXVIII). Magno et
inaestimabili gaudio mens nostra potest hilarescere, si quam eminenti
gratia natura humana de morte translata sit ad gloriam curet attendere.
Duplo enim amplius exaltata est quae cecidit, si attendas de quo statu
ceciderit, et ad quem ascenderit. Lapsus enim est de animali et mortali
ad mortuum. Primus enim homo factus est in animam viventem, id est,
vitam animalem; et si animalem, etiam mortalem. Et corpus mortuum est
propter peccata. Reparatio autem facta est de mortuo ad immortale et
spirituale; quia secundus homo in spiritum vivificantem, hoc est,
quidquid mortale inerat immortalitate absorbente. Tres autem in homine
gradus constituo: mortalem, mortuum, immortalem. Mortuum peccatum
dejecit de medio ad infimum, gratia erexit de infimo ad summum, ut non
sit regressus de mortuo ad statum primi hominis animalem, sed magis fiat
ascensus ad vitam secundi immortalem. Quatuor autem rationalis creaturae
status esse discernuntur. Primus, creaturae miserae et mortalis;
secundus, creaturae beatae sed mortalis; tertius, creaturae miserae
licet immortalis; quartus, creaturae beatae et immortalis. In primo
consistit creatura misera et mortalis; in secundo, creatura beata et
mortalis; in tertio, creatura misera et immortalis; in quarto, creatura
beata et immortalis. Primus status, creatura mortalis et misera, est
homo injustus: propter conditionem mortalis, propter pravam voluntatem
et peccatum miserrimus. Nam peccatum hominem facit miserum, ut merito ei
dicatur: Miserere animae tuae, placens Deo (Eccli. XXX). Quasi dicatur:
Miserere, licet misera est, quia beata esse potest. Secundus, creatura
beata et mortalis, homo justus, mortalis ex jure conditionis, beatus ex
habitu justitiae. David enim dicit beatitudinem esse illius hominis cui
Deus accepto fert justitiam. Nam beatus justus vir cui non imputavit
Dominus injustitiam. In hoc enim: beati sunt pauperes spiritu, beati
mites (Matth. V), et caeteri. Tertius, creatura misera et immortalis,
apostatae sunt angeli habentes miseriam immortalem, velut creatura quae
immortaliter est miseriae deputata. Est enim immortalis propter aevum
naturae indissolubilis, misera vero propter nequitiam malitiae
insolubilis. Tria autem sunt quae concurrunt ad ejus miseriam: cruciatus
invidiae, quo ex alieno successu scilicet hominis justi, tabescit
invidia; tormentum conscientiae, quae, acerbissima dissectione in
semetipsam cujus culpa talis facta est, nova rabie grassatur; imminentis
terror gehennae, quae ipsos excutiat. Quartus status est creatura beata
et immortalis, angelicus spiritus, quae contemplatione Creatoris beata,
perennitate vitae et immortalis. In primo ergo statu, creatura misera et
mortalis, est homo injustus. In secundo, creatura beata et mortalis,
homo justus. In tertio, creatura misera et immortalis, spiritus
apostaticus. In quarto, creatura beata et immortalis, angelicus
spiritus. Homo quoque quadripartitae creaturae statui congruit.
Quadripartita est potestas, quae Christo glorificato data est. Accepit
enim potestatem justificandi, quae creaturam mortalem et miseram, beatam
faceret, et vivificandi, qua beatam et mortalem, beatam et immortalem
constitueret, et judicandi, qua beatam immortalem a misera et mortali
discerneret, et glorificandi, qua discretam judicio, gloriosam et
immortalem efficeret. De prima dicitur: Filius habet potestatem
dimittendi peccata (Matth., XI). De secunda: Potestatem habeo ponendi
animam meam (Joan. X). De tertia: Timete eum qui potestatem habet corpus
et animam mittere in gehennam (Matth. X). De quarta: Sicut dedisti ei
potestatem omnis carnis, ut omne quod dedisti ei, det illis vitam
aeternam (Joan. XVII). Prima quidem a misera et mortali tollit
impietatem; secunda a misera et mortali excludit immortalitatem; tertia
discretae a misera et immortali quae mutari non potest, commutandi in
melius donat possibilitatem; quarta jam assumptae in gloriam, lucis
inacessibilis exhibet claritatem. Prima ergo sanat interius, secunda
exterius. Illa culpam amovens, haec poenam, eam quae ex peccato accidit
corporaliter, non illam quae post corpus imminet aeternaliter. Nam ab
hac tertia quae sequitur, potestas judiciaria discernit alios ad eam per
hanc mortalitatis poenam nascendo, alios item ab ea quasi instanti
pariter eximendo. Optimum ergo et justum est, ut omne genuflectatur
coelestium, terrestrium, et infernorum, in nomine Jesu (Philip. II).
Quem propter passionem videmus gloria et honore coronatum: coelestium,
propter potestatem glorificandi; terrestrium, propter potestatem
justificandi; infernorum, propter potestatem judicandi mortuorum et
vivorum. Propter potestatem vivificandi, creatura misera vel injusta et
mortalis amplectetur et diligat potestatem justificandi. Creatura justa
et mortalis praestoletur fideliter potestatem vivificandi. Creatura
misera et immortalis, experiatur potestatem judicandi. Creatura beata et
immortalis perfruatur feliciter potestate glorificandi.
|
|
