|
Tres sunt status hominis: Primus poenitentiae, secundus justitiae,
tertius vitae aeternae. Et secundum tres istos status tria debemus
offerre sacrificia. In primo statu sacrificium compunctionis; in
secundo, bonae operationis; in tertio, laudis et jubilationis. Hoc
triplici sacrificio offerre nos Deo jubemur cum dicitur: Sacrificate
sacrificium justitiae, et sperate in Domino (Psal. IV). Initium enim
justitiae est compunctio, profectus ejus operatio, bona consummatio
ipsius, laus vitae aeternae. Unumquodque istorum suam habet pinguedinem.
Primum butyrum humilitatis secundum oleum discretionis, tertium,
balsamum charitatis.
|
|
