TIT. CX. De inaequalitate gradientium ad Deum.

Non omnes uniformiter gradiuntur ad Deum. Quidam lento passu, sicut ii qui terrenorum curis impliciti vix aliquando respirant ut Dei recordentur: quidam modesto incessu, sicut ii qui Domini servitio mancipati Deo quidem serviunt, et tamen erga seipsos indulgentiores existunt; alii veloci, id est rapido cursu, sicut ii qui super carnem suam intuentes, et sic transitoria contemnentes, celeriter proficiscuntur ad Deum: hoc solummodo cupientes in pace quiescere in idipsum.