TIT. CXLI. De poenitentiae speciebus et partibus.

Tres sunt species poenitentiae: simulatoria et infructuosa, cujus exemplum est in Esau et in Saul; crudelis et desperata, sicut in Cain et Juda; utilis et consummata, sicut in Magdalena et Zachaeo. Cujus partes sunt quinque: Contritio in corde, confessio in ore, maceratio in carne, correctio in opere, perseverantia in virtute.