TIT. CLIX. De triplici edulio apposito.

Quod nobis apponitur ad edendum trifarium est carnis edulium: haedus de capris in fructu poenitentiae, quem Jacob obtulit patri suo Isaac, ut benediceretur; vitulus de armento in actu justitiae, quem Abraham expendit in cibum angelorum; vitulus saginatus in cumulo gloriae, quem pater recepto filio prodigo dicitur mactasse.