TIT. V. De infirmo, causa morbi, medico et remedio morbi.

Infelix homo! quis me liberabit de corpore mortis hujus? (Rom. VII.) Hic quatuor consideranda: infirmus, causa morbi, medicus et remedium. Medicus Deus, infirmus homo, causa morbi amor mundi, remedium amor Dei. Horum differentia haec est: Amor mundi in principio dulcis, in fine amarus nimis; amor Dei ab amaritudine incipit, finitur in dulcedinem magnam. Unde architriclinus sponso: Omnis homo primum bonum vinum ponit; sed cum inebriati fuerint, tunc id quod deterius est, etc. (Joan. II).