|
Exiit edictum a Caesare Augusto, etc. (Luc. II). Tria sunt edicta:
Primum ad liberationem, secundum ad purgationem, tertium ad salvationem.
Primum exivit a sapientia, secundum a potentia, tertium a gloria. Nisi
sapientia exiret, potentia non salvaret nos, nec gloria vivificaret.
Exivit filius qui diu latuit. Sicut Scriptura ait, Moyses latuit tribus
mensibus in domo patris (Exod. II), Christus tribus temporibus in sinu
Patris: ante diluvium, post diluvium, post legem. Ut exeat texitur
fiscella scirpea. Fiscella est Maria; scirpea, fragili ex carne sine
nodo culpae. Recens in aqua rore gratiae, pice et bitumine linitur ne
dissolvatur, neve aqua intret. Duo sunt mala hominis: unum carnis,
alterum spiritus, luxuria et superbia. Contra luxuriam adhibetur bitumen
virginitatis, contra superbiam pix humilitatis; et ideo aqua libidinis
non potest influere, quia carnem claudit bitumen, nec superbia potest
dissolvere, quia pix sigillat mentem. Audi vocem bituminis: Quoniam
virum non cognosco (Luc. I). Audi picem liquentem: Ecce ancilla Domini;
fiat mihi secundum verbum tuum (ibid.). Valida fiscella interius omne
bonum continet: exterius nullum malum accedit. In tali vase venit in
Aegyptum hujus mundi Dominus.
|
|
