|
Tres sunt adventus Dei, ad homines, in homines, contra homines. Non sunt
tam desiderabiles primus et ultimus quam medius, quo sapientia Dei in
hominem veniens facit ibi mansionem, aedificans domum, scindens columnas
septem, ut faciat sibi sedem (Prov. IX). Domus est homo, sedes anima,
septem columnae praeparamenta sedis. Justitia, inquit, et judicium
praeparatio sedis tuae (Psal. LXVIII). Justitia virtus est cuique quod
suum est tribuens, superiori, inferiori, aequali. Superiori obedientiam
et reverentiam: quarum altera corporis, altera cordis est. Aequali
consilium quo instruatur ignorantia, et auxilium quo juvetur infirmitas,
non solum in verbo et officio, sed etiam exemplo quo provocetur ad
meliora, et oratione qua juvetur a Domino. Inferiori custodiam, qua
cavere possit peccatum futurum: et disciplinam qua puniatur admissum. Si
ergo superiori reddis devotionem et obedientiam, aequali consilium et
auxilium, inferiori subdito custodiam et disciplinam, vel tibi ipsi qui
habes corpus tuum subditum, ut non regnent in eo peccata, et faciat
fructus dignos poenitentiae, veniet in te Dominus.
|
|
