|
In tribus salus aeterna consistit. Primum est abrenuntiare saeculo et
jungere se Deo; secundum, terrena contemnere et aeterna quaerere;
tertium, vitia calcare, et virtutibus operam dare. Hoc triduo in
holocaustum immolatur vacca trima, aries, taurus. Hoc triduo Dominus
turmae se in eremo sustinentis per miserationem suam miseretur. Hoc
triduo de vitiis ad virtutes, de luce ad tenebras transit Hebraeus.
Primo die deserit Pharaonem conjunctus Deo; secundo, servilia opera luti
et lateris, desiderans libertatem; tertio, de Aegypto exiens tendit ad
terram promissionis. De primo dicitur: Mihi adhaerere Deo bonum est
(Psal. LXXII); de secundo: Quae sursum sunt quaerite (Colos. III); de
tertio, Educ de custodia animam meam (Psal. CXLI).
|
|
