TIT. LXXXVII. De via carnis et spiritus.

Duae sunt viae: una carnis, altera spiritus. Una separat a Domino, altera revocat ad Dominum. Una visibilis, altera invisibilis. In prima mundi amatores spatiantur; in secunda mundi contemptores requiescunt. Primi sunt Hebraei secundum carnem, qui sic transeunt per bona temporalia ut aeterna mala incurrant; secundi Hebraei secundum spiritum, qui per ista transeunt ad aeterna bona.