|
Tria in redemptione sunt dilectionis incitamenta: tempus, modus,
fructus. In tempore tria considerantur: Corruptio naturae, transgressio
legis, plenitudo malitiae. In modo quoque tria, quia exinanivit se usque
ad hominem, descendit usque ad crucem, passus est usque ad mortem. In
fructu item tria: perfecta veritas, quae ignorantiam abjecit; consummata
charitas, quae concupiscentiam abstulit; secura aeternitas, quae
oblivionem removit. In tempore igitur est consummatio mali; in modo,
exinanitio Dei; in fructu, de illo repletio nostri. Quis concipere
posset quantae miserationis fuit exterminare malitiam, delere culpam,
informare naturam? quantae humanitatis, Dominum Majestatis in carne
mortem tolerare, in cruce pati? quantae dignationis exstiterit, caecatae
rationi refundere plenitudinem lucis, foedatae voluntati multitudinem
pacis, turbatae memoriae continuationem clarae aeternitatis?
|
|
