TIT. XIV. De hora completorii.

Hora completorii nobis illud commemorat de passione Domini, quod, egresso Juda, coepit Dominus pavere et taedere, et factus in agonia prolixius orare et guttis sanguinei sudoris torcular solus calcans, in futuro sanguinem martyrum pro se fundendum praesignat. Itemque de resurrectione ejus: quod postquam fecerat pacem inter Deum et homines, legatus fidelis rediens evangelizavit nobis, stans in medio discipulorum et dicens: Pax vobis (Joan. XX).