|
Sabbato ante Palmas vacat, quoniam Dominus papa eleemosynam dat. Hoc est
illud Sabbatum quando Dominus in Bethaniam venit, et in domo Lazari quem
suscitaverat coenat, ubi Maria Magdalena pedes ejus lavit et capillis
tersit (Luc. VII), sicut refert Evangelista: Ante sex dies Paschae,
inquit (Joan. XII), etc. Ibi celebri mysterio commendatum est odoriferum
opus eleemosynae. Maria, id est Ecclesia, pedes Domini, id est pauperes
tanquam extrema membra Christi, capillis, qui corpori superfluunt,
tergit, id est divitiis quae divitibus superabundant sustentat. Ut
igitur dominus papa celebrem cum Maria Domino coenam exhibeat, hoc
Sabbato eleemosynam dat; atque ita circa pedes Domini occupatur.
|
|
