|
In ipso autem die coenae Domini duo mandata consuevit homo facere,
pauperum videlicet et congregationis: In primo, Maria suscipiens
Christum in Bethania, ad convivium surrexit a coena et accipiens libram
unguenti, unxit pedes Jesu, et capillis tersit, et domus impleta est ex
odore unguenti. Haec mulier typum gessit Ecclesiae, quae pedes Domini
ungens, id est pauperes eleemosynis refovens, capillis tergit, dum eos
superfluis reficit. Hoc ergo mandatum est Ecclesiae obsequium; ideoque
omnis congregatio pedes lavat pauperum, quae veluti Maria Christum in
Bethaniam ad coenam invitat, dum pauperes in quibus Christus, in domo
obedientiae charitatis officium exhibendo recipit, surgens a coena,
quasi jejunium frangens, fert libram unguenti, dum surgens a mensa post
modicum gustum intentionem gerit eleemosynae Christum redolentis. Hoc
mandatum pauperum dicitur Ecclesiae; mandatum autem congregationis
Christi. Ideoque in primo tota congregatio; in secundo soli praelati
vice Christi deserviunt. Pulchre autem Ecclesia suo mandato Dominum suum
praevenit, ut, antequam Christus pedes discipulorum lavet, ipsi
discipuli Christi pedes, id est pauperum lavent, et eleemosynae unguento
ungant, ut domus, in qua Christus, hora qua per praelatos nostros pedes
laverat, impleatur ex odore hujus unguenti.
|
|
