|
Vos autem fratres, qui scholam disciplinae jam intrastis, in lectione
divina prius debetis quaerere, quod mores instruat ad virtutem, quam
quod sensum acuat ad subtilitatem, magisque velle informari praeceptis
Scripturarum, quam quaestionibus impediri. Cum igitur divinas Scripturas
legitis, solerter perpendite quid ibi dictum sit ad excitandum in vobis
amorem Dei, quid ad contemptum saeculi, quid ad cavendas insidias
inimici, quid ad bonos affectus nutriendos et parva desideria
exstinguenda valeat, et quid citius cor per compunctionis ardorem
accendat. Quid disciplinam in opere, quid humilitatem in cogitatione,
quid patientiam in adversis habere doceat, quid denique ad agenda bona
securum, et ad mala cavenda doceat esse circumspectum. Hoc modo lecta
scriptura intelligentiam confert salutarem, et hanc ipsam sapientiam
(quam pro virtute libenter despicitis) melius postmodum per virtutem
invenitis.
|
|
