QUAESTIO CXIV.

Non enim per legem promissio, etc. Quaeritur quomodo dicat Apostolus: Christo non est facta promissio per legem, sed per justitiam fidei; nonne in lege et per legem facta est promissio, scilicet in David ipsi Christo? Item: Quid est promissionem fieri Christo per justitiam fidei? Solutio. Non sic dicit Apostolus, quod promissio non sit facta per legem, sed per justitiam fidei; sed sic, quod promissio non est facta, ut esset haeres mundi per legem, sed per justitiam fidei.