QUAESTIO CLXXVI.

Quaeritur in qua persona loquatur Apostolus dum dicit: Ego autem carnalis sum (Rom. VII), in propria, an generali? Nam si in sua persona loquatur, quomodo dicit se esse carnalem, cum esset spiritualis? si autem in generali loquitur, ut omni justo et injusto cujuslibet temporis conveniat quod dicit, quomodo injusto convenit odire malum, et velle bonum, et legi Dei consentire? Solutio. Augustinus dicit quod in propria persona loquitur dicens, se carnalem propter motus quos sentiebat, et idem erat spiritualis, non consentiens illis motibus inordinatis. Non autem negari potest quin dicat quaedam, quae propriae personae non conveniant, ut illud: Vivebam aliquando sine lege (ibid.). Sunt qui dicunt quod in generali persona justi loquitur; sed justo quomodo convenit: Ego autem mortuus sum? (Ibid.) Nos autem dicimus quod sic loquitur Apostolus, quod quaedam conveniant homini legis naturalis, quaedam homini legis scriptae, quaedam homini legis gratiae; quid autem cui conveniat, diligenter notandum; nostri autem propositi est quaestiones prosequi, non litteram exponere.