QUAESTIO CLXXXI.

Quaeritur an consequens sit ipsum non operari simpliciter, si non operatur secundum mentem; sicut consequens est, et si facit secundum carnem, et simpliciter facit. Solutio. Est quidem verum, quod ad affirmationem determinatam sequitur simplex affirmatio fere semper, sed negationem determinatam non solet sequi simplex negatio; unde oportet vim facere in pronomine cum dicitur: Ego non operor (ibid.), quasi ego interior, in quo veritas hominis consistit, quia imago Dei; et sic negatio, quae videtur esse simplex, non est simplex, sed potius determinata.