QUAESTIO CC.

Quaeritur quid sit esse cohaeredes Christi. Solutio. Ejusdem haereditatis participes. Sed secundum hoc videtur falsum nos esse cohaeredes; quia possessio gentium, Christi est haereditas. Unde: Postula a me, et dabo tibi gentes haereditatem tuam (Psal. II): cujus haereditatis non sumus participes, et sic non sumus cohaeredes. Solutio. Haereditas Christi, secundum quam nos sumus cohaeredes, est vita aeterna, non gentium possessio.