|
Corde creditur ad justitiam. Dicit glossa quod caetera potest homo
nolens; credere autem non potest nisi volens. Sed hoc quomodo verum est?
Nonne sperare, et diligere nemo potest nisi volens? Quomodo ergo dicit,
caetera potest etiam nolens, cum haec sint alia, quam credere? Solutio.
Per caetera intelligit exteriora. Sed iterum videtur falsum quod
exteriora faciat aliquis nolens: si enim nullo modo vellet, quomodo
faceret? Solutio. Velle, ponitur pro approbaret: saepe enim multa
facimus quae non approbamus.
|
|
