|
Qui infirmus est, olus manducet. Unusquisque autem in suo sensu abundet.
Quaeritur quomodo Apostolus suadeat illum, qui cibos discernit sibi esse
derelinquendum, cum malum sit cibos discernere, et hunc mundum, et hunc
immundum putare, cum potius a tali errore esset retrahendum, hoc enim ei
concedere videtur, cum hoc sit eum in errore fovere. Solutio. Permittit
minus malum fieri ut majus malum devitetur: majus enim malum esset
contra conscientiam edere, quam cibis quibusdam abstinere, cum ab eis
abstinendum esse putet: quisquis enim contra conscientiam facit, peccat.
|
|
