|
Quaeritur igitur, cum iste hac intentione hominem justum occidat, cum
hoc facere debeat, an hoc agendo mereatur? Quisquis enim pro Deo agit,
quod pro Deo agendum putat, meretur, sed iste pro Deo agit, quod pro Deo
agendum credit: ergo ex hoc meretur. Quod autem hoc agere debeat, inde
constat; quia si dimittit, mortaliter peccat. Solutio. Aliqui
verisimiliter dicunt, quod hic se in arctum misit et ita sive procedat,
sive recedat, labitur: ut si quis ante se ignem videat, retro
praecipitium aquae sentiat, utrobique periculum incurrat. Aliis autem
videtur, quod ibi duo sunt, error et zelus: quod autem erroris est,
malum est; quod vero zeli, bonum est, et meritum habet. Est enim
voluntas bona, id vero in quo exercetur, malum; in hoc itaque peccat, in
illo meretur.
|
|
