QUAESTIO CCCXXV.

Etenim Christus non sibi placuit. (Rom. XV.) Quaeritur quomodo hoc sit intelligendum. Nonne una est voluntas Patris et ipsius Filii? quomodo ergo potuit placere Patri, et non sibi? Quod autem Patri in omnibus placuit, nemo est qui ambigat. Solutio. Non sibi placuit secundum carnis infirmitatem, cujus afflictionem non respuit, juxta quod alibi dicit: Non veni facere voluntatem meam (Joan. VI), id est, non venit implere affectum illum quem habuit a natura carnis, sed illum subjiciebat imperio rationis, quae ratio in omnibus divinae voluntati obediebat.