QUAESTIO CIX.

Vir imago et gloria est Dei, mulier vero imago et gloria est viri, etc. Quaeritur quomodo vir sit imago Dei et non mulier, cum in Genesi scriptum sit de utroque, quod facti sunt ad imaginem Dei? (Gen. I.) Solutio. Alia est imago communis viro et mulieri, de qua agitur in Genesi; alia est illa, quae soli viro et non mulieri convenit. Prima consistit in potentia naturali cognoscendi Deum; secunda in hoc intelligitur quod, sicut ex Deo omnia, sic ex uno homine omnes homines. Vel moraliter accipiendum: ut per virum, intelligatur ratio; per mulierem sensualitas, et secundum hoc vir et non mulier, est imago Dei.