QUAESTIO LVI.

De quibus autem scripsistis mihi, etc. (I Cor. VII.) De conjugio tripliciter agit, secundum praeceptum, secundum permissionem, secundum consilium, quae singula diligens lector in suis locis distinguat. Quid sit conjugium videndum est, quae causa efficiens, quae causa propter quam contrahitur, quae sint legitimae personae, et quae sint bona conjugii. Est itaque conjugium vel matrimonium maritalis conjunctio maris et feminae, inter legitimas personas individualem vitae consuetudinem retinens. Haec definitio tantum conjugio convenit fidelium. Secundum alios: Conjugium est potestas legitime commiscendi, et ex legitimo consensu contracta. Causa efficiens est consensus materialis per verba de praesenti expressus. Consensus, qui in anima est, coram Ecclesia debet demonstrare, sine quo non est conjugium, unde legitur: Matrimonium non facit copula corporum, sed voluntas animarum. Causa propter quam contrahitur, est procreatio prolis, et vitatio fornicationis. Legitimae personae sunt: quas non impedit vel votum continentiae, vel sanguis, vel ordo, vel dispar cultus, vel conditio, vel frigiditas naturae. Tria sunt bona conjugii: Fides, proles, sacramentum scilicet inseparabilitas, quae duplex est, sacramenti et ipsius matrimonii: hoc enim bonum tertium scilicet sacramentum non ipsum est conjugium, licet ipsum sit sacramentum, sicut et illud: sed utrum ejusdem rei utrumque sit, potest quaeri quod hic solvere postponimus causa brevitatis, cujus vestigia sequimur: in sacramentis enim et sententiis majorum, haec diligentius prosequimur.