QUAESTIO LXII.

Quod si infidelis discedit, discedat. Quaeritur, si inter fidelem et infidelem est conjugium, quomodo Apostolus dicat: Si voluerit discedere, discedat infidelis, et fidelis, alteri copuletur (I Cor. VII), cum superius dicat, quod dimissa innupta maneat: si enim verum conjugium, quomodo solvi potest? si non est conjugium, quomodo persuadet simul manere, cum omnis copula praeter legitimam sit fornicaria? Solutio. Fidelis potestatem habet in corpore infidelis, sed non e converso; quia, sicut legitur, injuria Creatoris solvit jus matrimonii: fidelis ergo potest manere, et discedere. Quia etiam debitum illud, quod debuit, ante solutum est; sed potestatem quam habuit, non amisit. Infidelis vero discedens, si alii se conjunxerit, adulterium committit.