QUAESTIO LXVI.

Qui autem fornicatur, in corpus suum peccat, etc. Ex his verbis videtur fornicatio gravior caeteris peccatis: ubi enim major delectatio et major contemptus, sic et major offensa. Solutio. Quaedam delectatio ex poena inflicta pro originali peccato inest membris nostris: quae licet sit major in delectatione caeteris peccatis, non tamen omnibus aliis peccatis major in reatu vel culpa esse videtur. Item volunt probare auctoritate Hieronymi, quod fornicatio gravior sit caeteris peccatis. Dicit enim: Quanta praecessit in opere delectatio, tanta debet sequi in satisfactione mentis amaritudo, et sic videtur quod ubi major delectatio, ibi sit major culpa. Solutio. Hoc, ut arbitror, non dicitur in comparatione omnium aliorum; sed in quolibet genere juxta quantitatem delectationis intelligitur quantitas criminis.