QUAESTIO VII.

In magna domo sunt non solum vasa aurea, et argentea, etc. Quaeritur quos intelligit per vasa aurea, et argentea, et quos per vasa lignea, et fictilia? Solutio. Per vasa aurea, et argentea intelligit praedestinatos; per vasa lignea et fictilia, reprobos. Vel per vasa aurea intelliguntur boni, sive sint praedestinati, sive non; per vasa lignea et fictilia, mali, sive sint ad vitam praesciti, sive reprobi. Et sic secundum hanc sententiam de utrisque quaedam sunt ad honorem, quaedam ad contumeliam. Secundum vero priorem ad honorem tantum sunt vasa aurea et argentea; ad contumeliam vero lignea et fictilia. Stultas quaestiones, et sine disciplina devita, etc. Hic innuit non omnes quaestiones vitandas esse, sed illas tantum, in quibus nullus est fructus. Habentes speciem pietatis: virtutem ejus negantes. Tales multi sunt in hoc tempore, quales hic describit Apostolus, qui se, non Deum, diligunt: habentes nomen et habitum sanctitatis, cum intus sint pleni omnium immunditiarum. Virtutem pietatis vocat charitatem, de qua scriptum est: Fortis est ut mors dilectio (Cant. VIII): hanc necessario praecedit mundi contemptus.