QUAESTIO II.

Ita te, frater, fruar in Domino, etc. Quid est frui? nonne alicui inhaerere propter se per amorem? sed sic solo Deo fruendum est, quia solus Deus propter se diligendus est; quomodo ergo dicit Apostolus ad Philemonem: Ita te, frater, fruar in Domino. Solutio. Non dicit simpliciter, ego te frater fruar; sed addit in Domino, per hoc innuens se finem dilectionis in Domino posuisse. Vel frui dicitur uti cum quadam delectatione, et sic potest hic accipi.