QUAESTIO XXI.

Ipsi peribunt, etc. Quaeritur de quibus coelis dicat, quod sint perituri. Solutio. De coelis aereis, ut dicit expositor, qui per diluvium perierunt, et igne perituri sunt. Unde quaeritur, si jam per diluvium perierunt, quomodo iterum per ignem perituri sunt? Nonne si jam perierunt, esse desierunt, et si jam desierunt, quomodo iterum igne peribunt? Solutio. Per diluvium perierunt, id est in deterius mutati sunt et iidem ipsi igne perituri sunt, id est in meliorem statum mutandi sunt. De terra autem, et coelis superioribus non est quaestio, quin in melius sunt mutanda: unde Petrus ait: Novos coelos, et novam terram exspectamus (II Pet. III). De aqua et aere dubitatur an in meliorem statum sint mutanda, sicut terra et coelum, quia in Apocalypsi scriptum est: Et mare jam non erat (Apoc. XXI). Et hic de coelis aereis scriptum est: Ipsi peribunt. Unde quibusdam videtur quod aqua et aer illas proprietates, ex quibus haec nomina eis conveniunt, amittent, et cum ipsis etiam nomina perdent, non tamen ex toto annihilabuntur, sed nec aqua, nec aer amplius vocabuntur privatis et annihilatis his, unde prius sic dicebantur.