|
Dicit expositor quod nisi homo esset qui diabolum vinceret, non juste,
sed violenter homo ei tolleretur. Sed nonne diabolus injuriam Deo
fecerat, qui servum prius fraudulenter decepit, et post violenter
possedit? Quam ergo injustitiam faceret Deus, si solo verbo potentiae
suae eriperet hominem de manu injustissimi invasoris? Solutio. Omnia
opera Dei justa, sed in quibusdam etiam est manifesta potentia, et latet
justitia; in quibusdam etiam occulta latet potentia, et manifesta est
justitia. Si ergo Christus in liberatione nostra uteretur manifesta
potentia, et occulta justitia posset videri alicui minus discreto, quod
homo non juste, sed violenter diabolo tolleretur: ut autem omnis
iniquitas oppilaret os suum (Psal. CVI), usus est Dominus noster in
nostri redemptione manifesta justitia, et occulta potentia.
|
|
