|
Secundum diem tentationis, etc. Quaeritur a quibus fiat tentatio.
Solutio. Tentat homo, ut sciat quod ignorat, secundum quam acceptionem
tentatio est quaedam animi blanda praecurrens experientia, ad aliquid
agnoscendum, quod prius ignorabatur. Tentat Deus, ut probet per
afflictionem et tribulationem, ut probatum coronet. Tentat diabolus, ut
dejiciat aliquem in peccatum: unde dicitur: Et ne nos inducas in
tentationem (Matth. VI), id est ne sinas dejici in peccatum. Tentat
caro, cum ejus motus inordinatos sentimus. Tentat mundus, cum nos per
vanitatem ad amorem sui provocat.
|
|
