QUAESTIO LXIII.

Intravit Dominus per semetipsum, etc. Cum Dominus in Evangelio dicat: Sit sermo vester: Est, est; Non, non: quod autem amplius est, a malo est (Matth. V), quaeritur quomodo juravit Dominus tunc Abrahae. Nunquid non crederet, vel tardius crederet Abraham Deo, si promitteret sine juramento? Solutio. Non propter Abraham juravit Dominus, cum sine juramento ei firmiter crederet: sed propter eos, qui post eum futuri erant, qui promissioni factae Abrahae aut omnino non crederent, aut tardius crederent, nisi esset per juramentum confirmata, et sic juramentum illud fuit non a malo Abrahae, sed illorum qui futuri erant.