|
Secundum ordinem Melchisedech (Hebr. VII), etc. Quaeritur quomodo?
Solutio. Christus secundum ordinem Melchisedech pontifex multis modis
dicitur. Tum quia ille rex et sacerdos solus fuit, ita Christus; tum
quia non oleo visibili, ut Moyses institutus fuit, sed oleo
exsultationis et puritate fidei unctus est; nec animalia immolavit, sed
in pane et vino oblato sacrificium Christi dedicavit; sic et Christus
Spiritu sancto unctus est a Patre; qui semetipsum in ara crucis Deo
Patri obtulit; et quia verum corpus et sanguinem in coena discipulis
dedit, et quia ejus sacerdotium manet in aeternum secundum ritum et
dignitatem.
|
|
