QUAESTIO XXVI.

Qui gloriatur, in Domino glorietur. Quaeritur quid sit in Domino gloriari, cum alibi dicat: Absit mihi gloriari, nisi in cruce Domini nostri Jesu Christi (Galat. VI). Et illud: Non solum gloriamur in spe filiorum Dei, sed etiam in tribulationibus nostris (Rom. V). Nunquid idem est in Domino, et in cruce Domini, et in tribulationibus gloriari? Quid est gloriari? Solutio. Gloriari est gaudere laude, et gloria se dignum judicare. In Domino gloriari est totam fiduciam non sibi, sed Domino tanquam auctori attribuere, et in Christo exsultare gaudio spirituali. In cruce Domini gloriari duobus modis potest intelligi. Ille enim recte in cruce Domini gloriari dicitur, qui cum gaudio, et spe futurae vitae imitatur Domini passionem, et hoc est gloriari in tribulationibus. Dicitur etiam aliquis gloriari in cruce Domini, qui non judicat se dignum salute, nisi per passionis Dominicae meritum, dicens cum apostolo Petro: Quia non est aliud nomen sub coelo in quo oporteat nos salvos fieri (Act. IV), haec dico absque praejudicio melioris sententiae.