|
Si circumcidamini, Christus vobis nihil proderit. (Gal. V.) Nonne
circumcidit Apostolus Timotheum? Ergo decepit eum, et fecit ut Christus
nihil prodesset? Solutio. Hoc dicit de iis qui quaerebant justificari ex
circumcisione; et ideo se circumcidebant, et sic a gratia exciderunt,
quam credebant insufficientem esse. Illis autem, qui eam ex quadam
reverentia susceperunt, non tamen ponentes spem in ea, non erat
perniciosa secundum Augustinum, secundum vero Hieronymum omnibus
suscepta nocuit, nisi fieret dispensatio. De qua controversia superius
plenius dictum est.
|
|
