QUAESTIO II.

Dicit expositor quod Apostolus hic ponit duas praeordinationes: unam de praesenti justitia, alteram de futura corona. Sed cum una sit Dei praedestinatio, quae est ipse Deus, quaeritur quomodo duae dicantur? Solutio. Non ideo duae dicuntur, quin una sit; sed quia duos habet effectus, scilicet per praesentem justitiam, et futuram gloriam. Cui solutioni sic objicitur: Si numerus praedestinationum assignandus est secundum numerum effectuum, jam erunt infinitae praedestinationes, cum sint infiniti praedestinationis effectus. Solutio. Omnes justitiae, quia numero et non specie differunt, unus effectus dicuntur esse, sic et omnes coronae, quia non specie, sed solo numero discernuntur, unus effectus praedestinationis dicuntur. Quoniam vero praesens justitia et futura gloria non solum numero, sed etiam specie differunt, non incongrue duo effectus praedestinationis dicuntur. Notandum quod multa sunt hujusmodi, quae cum sint plura numero, et unum specie, simpliciter non plura, sed unum secundum usum loquendi dicuntur, ut fides mea et fides illius cum duae sint numero, non tamen duae simpliciter, sed una dicuntur; quia una sunt specie; sic de herba, de voce, de intellectu, visu et multis aliis, littera, figura, elemento, vocali, differendum est.