QUAESTIO XXXVII.

Filii, obedite parentibus vestris; et vos, patres, nolite ad iracundiam provocare filios. Quaeritur quare Apostolus praecipiat parentibus ut filios diligant, et filiis ut parentes honorent, cum natura ad se mutuo diligendos compellat. Solutio. Naturalis amor non habet meritum, nisi propter Deum fiat: ideo praecipit ut se propter Deum diligant, et sic meritum habeant.