|
Gratias agentes, etc. Dicit expositor quod hic incipit Apostolus
ostendere quod lex non prodest, sed nocet. Nonne lex bona, et a Deo
data, et non solum non nocuit, sed profuit in statu suo? quomodo ergo
verum est quod non prodest, sed nocet? Solutio. Verum est quod lex ante
gratiam profuit; sed post gratiam inutilis fuit. Cui solutioni sic
objicitur: Nonne lex modo perhibet testimonium veritati, et per illam
illuminamur in cognitione Deitatis? ergo etiam nunc tempore gratiae
nobis prodest lex. Quomodo ergo verum est: Lex non prodest, sed nocet?
Solutio. Lex lecta, et spiritualiter intellecta prodest, et non nocet:
secundum vero litteram observata non prodest, sed nocet.
|
|
