QUAESTIO II.

Pervenit enim ira Dei super illos. (I Thess. II). Quaeritur quomodo propter peccata sua ira Dei, et poena super eos pervenerit, id est ante mortem. Nunquid poena aeterna allevatur per poenam temporalem? si enim non allevatur, videtur Deus immisericors, qui hic punit, et ibi. Item, si allevatur aeterna per temporalem, videtur quod talis poena non procedat ex ira Dei, sed ex misericordia; et ideo non ira, sed misericordia dicenda. Solutio. Magna quidem Dei misericordia est per poenam temporalem vocare ad poenitentiam; sed ipsi nolentes poenitere, Dei misericordiam vertunt sibi in iram, et poena inflicta, quae potuit esse salutis medium, fit illis aeternae poenae initium.