QUAESTIO V.

Ut non contristemini sicut caeteri, qui spem non habent. (I Thess. IV). Quaeritur an contristari et flere pro morte amicorum sit peccatum, cum Apostolus dicat: Ut non contristemini? Solutio. Necesse est ut cum mors occupat dilectum, ut contristet dilectionis affectum; non ergo culpa, si contristemur necessitate amittendi; si consolamur spe recipiendi: unde Apostolus non dicit simpliciter, ut non contristemini, sed ait, ut non contristemini sicut caeteri, qui spem non habent, quasi diceret: Licet contristari, sed cum spe.