QUAESTIO XII.

Signis, et prodigiis mendacibus, etc. Quaeritur de signis illis, quae per diabolum faciet Antichristus, an ideo dicta sint mendacia, quia non vera ut videntur, sed phantastica erunt; id est quia mortales sensus per phantasmata decepturus est, vel ideo dicta sunt mendacia, quia Dei permissione ad mendacium trahent? Solutio. Videtur nobis verisimile esse, quod omnia signa illa, quae diabolus poterit facere, et Antichristus faciet vere. Illa vero, quae diabolus non habet in sua potestate, nec ille iniquus faciet vere, sed per solam magicam artem deludet oculos mortalium ut videatur facere, quae vere non faciet. Unde Apostolus dicit: Cujus adventus erit in omni virtute, quantum ad ea, quae vere faciet, et in omni seductione, quantum ad ea quae non vere faciet. Omnia tamen valent ad seductionem impiorum. Quae autem sunt illa, quae diabolus poterit et quae non potestati ejus subjacent, non est nostrae parvitatis evolvere.