QUAESTIO XVII.

Salvabitur autem mulier per filiorum generationem. Si generatio filiorum salvet, quid faciet continens vel virgo? nunquid non salvabitur, quia non habet filios? quid est quod alibi ait Apostolus: Beatior autem erit, sive vidua, sive virgo, si sic permanserit? Solutio. Non ponit causam salutis in filiorum generatione; sed potius in fide et dilectione, unde subjungit: Si permanserit in fide et dilectione. Et est sensus, et si mulier fuerit causa peccati, tamen salvabitur non solum continens, vel virgo, sed etiam nupta, etsi nunquam a filiorum generatione cessans, sed per filiorum generationem incedens ab hoc mundo exierit, si tamen permanserint in fide et dilectione. Vel augmentum salutis valebit ei, si filii ejus per doctrinam, et industriam ipsius permanserint in fide et dilectione, Vel mystice potius intelligitur. Mulier typus est carnis, quae alibi signatur per turturem. Adam est figura rationis, quae per passerem figuratur. Filii sunt bona opera, quae per pullos turturis intelliguntur, qui in nido Catholicae fidei tantum vivunt; extra non vigent, imo conculcantur, quia bona opera non prosunt paganis, Judaeis, haereticis, schismaticis. Unde dicit hic: Si permanserit in fide et dilectione, scilicet filii mulieris, pulli turturis, bona opera.