|
Materia divinae Scripturae est Verbum incarnatum cum omnibus sacramentis
suis, tam praecedentibus a principio mundi quam futuris usque ad finem
saeculi. Et sciendum quod tota ista series et porrectio temporis
dividenda est in duos status: veterem, et novum, et tria tempora
naturalis legis, et scriptae et gratiae, et sex aetates. Prima aetas ab
Adam usque ad Noe. Secunda a Noe usque ad Abraham. Tertia ab Abraham
usque ad David. Quarta a David usque ad transmigrationem Babylonis.
Quinta a transmigratione Babylonis usque ad adventum Christi. Item
quinque aetates praecedentes, id est ab Adam usque ad Christum
distinguuntur in quatuor successiones. Prima patriarcharum fuit ab Adam
usque ad Moysem. Secunda fuit a Moyse usque ad David, quae est judicum.
Tertia, quae est Regum, a David usque ad transmigrationem Babylonis.
Quarta a transmigratione Babylonis usque ad Christum; et haec successio
sacerdotum fuit. Status dicuntur, quia adesse hominis pertinent. Vetus
dicitur status, quia in culpa et poena usque ad resurrectionem Christi.
Novus autem dicitur propter innovationem vitae humanae, quae per gratiam
Christi facta est usque ad finem saeculi. Item tempus naturalis legis
dicitur, eo quod homo suo naturali sensui relictus fuit sine communi
praeceptione. Tempus scriptae legis dicitur, eo quod tunc lex scripta in
populo Dei praecepta dabat vivendi. Tempus gratiae, quia Christus gratis
dedit implere quod lex praeceperat. Aetates dicuntur sex ad
similitudinem aetatis hominum. Fuit enim mundus et infans et puer, etc.
Et notandum quod aetates istae non distinguuntur secundum aequalia
spatia temporum, sed secundum communes innovationes rerum; ut fuit
diluvium, et electio Abrahae, et institutio regum et transmigratio in
Babylonem, et adventus Christi. Successio patriarcharum dicitur, quia eo
tempore soli patres praeerant filiis suis: quod duravit usque ad Moysem,
qui, primus in populo Dei principatum tenens, judex constitutus est non
tantum super filios suos, sed super totum populum Israel, licet jam
multi reges essent in gentibus. Vel ideo patriarcharum successio
nominatur, quia eo tempore successerunt sibi ad invicem primitivi illi
patres a quibus genus humanum disseminatum est et familiae derivatae, et
patriae denominatae, ut ab Edom Edumei, a Levi Levitae, a Juda Judaei
|
|
