|
Ite et vos in vineam meam: et quod justum fuerit dabo vobis (Matth. XX).
De vinea Dominica, fratres, ad quam nos invitat sermo divinus, brevem
vobis exhortationem faciemus, ne vestram dilectionem verbis
prolixioribus oneremus. Primum itaque videamus quis sit ager in quo
plantatio fit, quae vinea, quae fossio, quae binatio, quae tertiatio,
qui palmites, quae putatio, quae plicatio, quae folia, qui flores, quis
fructus, quis denarius qui promittitur. Ager iste cor humanum est, quod
debemus jugi compunctionum ligone scindere, et in ipso per gratiam
divinam vineam sive vites per bonas voluntates plantare, ut in bono
crescant, et palmites, folia, flores, fructumque producant. Debemus
vineam istam fodere per compunctionem, quae nascitur scrutatione
peccatorum nostrorum; binare per compunctionem, quae nascitur de
consideratione donorum nobis coelitus collatorum; tertiare per
compunctionem, quae oritur de praegustatione futurorum bonorum. Sunt
autem palmites bonae cogitationes de bona voluntate multipliciter
procedentes. Istam vineam putamus, quando cogitationes minus utiles
resecamus, et utilioribus propagandis vacamus. Palmites plicamus, quando
cogitationes nostras humiliamus, et quasi baculum in terram figimus,
quando mortalitatis nostrae recordamur, et quod terra sumus et in terram
ibimus reminiscimur. Sic plicuit vitem suam Abraham, quando dixit:
Loquar ad Dominum meum, cum sim pulvis et cinis (Gen. XVIII). Sic Jacob
quando dixit: Minor sum cunctis miserationibus tuis (Gen. XXXII). David
quoque dixit: Unicus et pauper sum ego (Psal. XXIV)). Beata Maria
plicuit suam vitem, et ait: Ecce ancilla Domini (Luc. I). Sed B. Paulus
palmitem suum plicuerat, quando dicebat: Non sum dignus vocari
apostolus, quia persecutus sum Ecclesiam Dei (I Cor. XV). Folia
designant bonam actionem, quae nos circumdat et ornat, sicut in aliis
sermonibus saepe jam diximus. Flores, eo quod redoleant et suum longe
spargant odorem, bonam famam insinuant, per quam sive prope sive longe
proximo redolemus. Fructus bonam designat conscientiam de justitia
consummata. Ad hoc enim laboramus ut bonam conscientiam habeamus, sicut
ille qui in vinea colenda desudat, ad hoc tendit ut fructum percipiat.
Habemus itaque, fratres, agrum cor nostrum, Dominicam vitem bonam
voluntatem, palmites bonas cogitationes. Fodiamus, binemus, tertiemus
eam, sicut scriptum est, per triplicem compunctionem. Putemus eam per
superfluarum et minus utilium cogitationum resecationem. Plicemus eam
per mentis humiliationem, ut producat folia per bona actionem, flores
per bonam famam, fructus per bonam conscientiam. Si sic, fratres
charissimi, in vinea Dominica laboraverimus, promissum denarium
percipiemus. Quid est iste denarius? Denarius iste est vita aeterna.
Denarius iste est quod oculus non vidit, nec auris audivit, nec in cor
hominis ascendit, quae praeparavit Deus diligentibus se (I Cor. II).
Denarius iste est summum bonum, in quo omne bonum, et a quo omne bonum.
In quo omne bonum per plenitudinem, a quo omne bonum per largitionem.
Denarius iste est Deum videre, et eum gustare. Videre per
contemplationem, gustare per dilectionem. In hac vinea nos laborantes
adjuvare, et isto denario nos dignetur remunerare Jesus Christus, qui
vivit et regnat, etc.
|
|
