|
Spiritualis potestas in clero ordinatur habens gradus et ordines
dignitatum differentes. Primum signaculum clerici est corona, qua
signatur ad partem sortis ministerii divini; cui servire regnare est.
Corona quippe regale decus significat. Sic dicit beatus Petrus
apostolus: Vos estis genus electum, regale sacerdotium (I Petr. II).
Propter hoc igitur coma capitis clerico in modum coronae tondetur, et
ipsa capitis summitas desuper nudatur et revelatur, ut per hoc detur
intelligi, quod ad regiam in Christo potestatem assumitur; et quod inter
ipsum et Deum deinceps velamen esse non debet, ut revelata facie, et
pura mente Domini sui gloriam contempletur. Summum capitis summum est
mentis. Denudatio capitis illuminationem significat mentis.
|
|
