|
Primum pontifex aquam benedicit, typicum sal admiscens, deinde Ecclesiam
ipsam extrinsecus ter gyrando aspergit, clero et populo subsequente.
Interim vero in circuitu dedicandae Ecclesiae intrinsecus duodecim
accensa sunt luminaria. Per singulas autem vices ad portam basilicae
veniens (quam ob sacramenti figuram clausam esse oportet) percutit virga
pastorali superliminare ipsius, dicens: Tollite portas principes
vestras, et elevamini portae aeternales, et introibit rex gloriae (Psal.
XXIII). Cui diaconus intus positus respondet: Quis est iste rex gloriae?
(Ibid.) Pontifex autem: Dominus virtutum ipse est rex gloriae (ibid.).
Tertia demum vice reserato ostio intrat pontifex cum clero et populo,
dicens ter: Pax huic domui (Luc. X). Deinde cum sacerdotibus et levitis
et clericis ad orationem prosternitur, pro sanctificatione ipsius domus
dedicandae. Postea consurgens ab oratione nondum salutans populum
dicendo: Dominus vobiscum (Ruth. II); tantummodo hortatur cunctos ad
orandum. His completis, incipit de sinistro angulo basilicae ab oriente
per pavimentum scribere alphabetum usque in dextrum angulum occidentis,
atque iterum a dextro angulo orientis usque in sinistrum angulum
occidentis. Dehinc ad altiora conscendit; et stans ante altare. Deum
sibi in adjutorium invocat, dicens: Deus in adjutorium meum intende,
Domine, ad adjuvandum me festina (Psal. LXIX). Gloria Patri. Sicut erat
in principio, et nunc et semper, etc., sine Alleluia. Post hoc aquam
benedicit, salem et cinerem admiscens, et faciens ter signum crucis
super ipsam, cui misturae vinum etiam additur. Posthaec tingit digitum
in aqua, et facit crucem per quatuor cornua altaris. Inde venit ante
altare, et circuiens aspergit illud septem vicibus, aspersorio facto de
hyssopo. Circuit dehinc totam Ecclesiam, intrinsecus aspergens parietes
ipsius eadem aqua faciens hoc et tertio. Interim vero cantatur psalmus:
Exsurgat Deus (Psal. LXVII), cum antiphona. Cantatur etiam antiphona:
Qui habitat in adjutorio Altissimi (Psal. XC). Circuit interim ipse
pontifex, transiens per mediam ecclesiam et cantans: Domus mea, domus,
etc. (Isa. LVI; Matth. XXI). Et iterum: Narrabo nomen tuum fratribus
meis; in medio ecclesiae laudabo te (Psal. XXI). His autem peractis,
pontifex se ad orationem confert, petens ut omnes qui eamdem domum
oraturi intraverint, exauditos se esse gaudeant. Completa itaque
expiatione, convertitur ad altare incipiens antiphonam: Introibo ad
altare Dei (Psal. XLII); cum ipso psalmo; et quod reliquum est de aqua
purificationis ad basim altaris effundit. Deinde ipsum altare linteo
extergitur, et pontifex incensum defert super illud. Postea facit crucem
in medio altaris et per quatuor angulos ejus, de oleo sanctificato.
Deinde in circuitu ecclesiae duodecim cruces chrismantur in parietibus,
ab ipso pontifice tres per singulos figuratae. Reversus deinde iterum ad
altare accensum thus super illud offert in modum crucis, et sic peracta
denique consecratione ipsum altare albis velaminibus operitur.
|
|
